skip to main |
skip to sidebar
كيف ابدأ ؟
بعد ما قرأت الكلام اللي فات كله ، و عاجبك الموضوع ، طيب ابتدي ازاي و اختار صندوق ازاي من كل الصناديق دي ؟؟؟
بص يا سيدي ، قبل ما تبص على الصناديق علشان تحدد انهو واحد مناسب ، مهم قوي تبص في المراية
يعني ايه ؟؟؟؟
يعني اعرف نفسك و امكانياتك الاول ، ده الترتيب الصح
ازاي تعرف امكانياتك نفسك و امكانياتك ؟
كل الناس في الدنيا عندهم كفتين ميزان ، الطمع و الخوف ، الطمع في المكسب و الخوف من الخساره
لكن الاختلاف بيكون في ثقل احدى كفتي الميزان عن الاخرى
فيه ناس ما بيهمهاش .... تفوت في الحديد ، علشان ربنا خالقه كده ، معاه الف جنيه ممكن ينزل يشتري بيها طوب على امل ان بكره هايبيعه ب 1010 و لو خسر فيه 500 ما بيهموش و يشتري حاجه تانية بال 500 علشان يبيعها اغلى
غالبا الناس دس بتكون سنها صغير نسبيا ، ما عنوش التزامات قوية ، و عارفين انه قدامهم مصدر و وقت يعوض فيه اللي راح
كمان اللي معاه مبلغ كبير ، و بيستثمر جزء بسيط منه ، برضه ما بيهمهوش ، لانه مش هايفرق قوي معاه ، لو كسب خير و الف بركه ، و لو خسر يبقى راح و ايه يعني ، معايا اللي يسندني ...
الناس دي بتفضل الاستثمار عالي المخاطره و الربحية
فيه ناس تانية مش كده ، ناس عندها التزامات و يادوب العملية ماشية ، احساسه بالمغامره اقل من صاحبنا الاول
الناس دي بتفضل الاستثمارات متوسطة الى قليلة المخاطرة
ناس تالته
لو تحلف له على الميه تجمد ، مش ناوي يغامر ، يغور المكسب اللي من مغامره بالقرشين اللي حيلتي
الناس دي لا تقبل مخاطر ، بتفضل الاستثمار قليل المخاطره او ما يسمى افتراضيا بالاستثمار عديم المخاطر ، لانه لا يوجد ابدا عديم المخاطر
انت مين فيهم ؟؟؟؟؟ حدد اولا !!!! مين اللي هايعرفك احسن منك ؟؟؟؟
يتبع.....
0 تعليقات
إرسال تعليق