كل ما تريد ان تعرفه عن صناديق الاستثمار المصرية ج4

طيب برضه كلام نظري ، تعال نترجمه بمثال عملي بحوار بين شخصين افتراضيين

• يا فلان ، عاوز استثمر في صناديق الاستثمار !!!

• و هو انت معاك فلوس للأستثمار

• معايا 100 الف جنيه ، بس مش عارف يعني ايه للأستثمار اللي حضرتك بتقولها دي !!

• للأستثمار يعني فلوس فائضة عن احتياجاتك المعيشية ، يعني مش محتاجها و شايلها في البنك بأي صورة كانت و بقالك فتره ما مديتش ايدك عليها نقول مثلا سته اشهر او سنه

• و الله مش عارف بالضبط ، الفلوس كانت في البنك و كل شوية لما اعوز اروح اسحب و لما تجيلي فلوس اروح اودع ، لكن كام للأستثمار ... ما اعرفش

• طيب انت قلت 100 الف ، تعال نشوف سوا انت ممكن تستثمر منهم قد ايه ... قولي ... انت عندك مصدر دخل

• اه ، باشتغل و ليا مرتب بيكفيني و يفيض منه ( الاخ باين عليه من هولندا)

• كويس ، يعني امورك المعيشية متدبره ، طيب عليك التزامات ؟

• اه طبعا ، محسوبك بعيد عنك متجوز و عندي عيلين ( يبقي نصحصح معاه ، ده وراه عيال)

• و طبعا عندك اقساط عربية و شقة و مدارس و تلاقيك داخل جمعيات و اشتراك نادي و خلافه

• اه، انت عرفت ازاي ؟

• كلنا كده ، المهم ، قد ايه بقى مجموع الحاجات دي ؟

• لو جمعناهم يطلعوا في السنه 40 الف

• يبقى نطرح من ال 100 بتوعك دول مصاريف سنه على جنب .

• ده ليه بقى ، لما تيجي الالتزامات ابقى اروح اسحب من الصندوق و اسددها

• لا غلط ، الصندوق عاوز سنه استثمار على الأقل علشان يجيب عائد كويس ، و علشان يعوض أي خسائر ممكن يمر بيها غير كده تبقى بتضيع وقتك و بتعرض حياتك لمشاكل

• ماشي ....يبقى فاضل معايا 60 ،،، شغال برضه مش وحش

• لا استنى ، هو انت عيالك دول ما بيعيوش ،،، لا قدر الله عيل عاوز يعمل عملية و لا العربية خبطهالك اتوبيس هاتعمل ايه ، ماهو برضه نشيل شوية احتياطي

• قد ايه

• قول بالميت 20 % من اجمالي الفلوس

• ما تخليهم 10 ...

• هو احنا هانفاصل ؟؟؟ ....لا .... انت باين عليك مغامر ، بس خليك فاكر انك راجل بتحب المخاطر ، و بالتالي ما تعيطش لما تعوز فلوس و متلاقيش

• لا ... لا خلاص ... على ايه ... بس هو كده فاضل معايا 40 بس ، هايعملوا ايه دول

• 40% من اجمالي فلوسك ده اكتر مبلغ تقدر تستثمره و انت مطمئن و تفضل في امان بأذن الله ، غير كده يبقى مغامره مش استثمار ، لان الصناديق وعاء ادخاري له خطوره ، دول مش شهادات استثمار ...

• طيب جت لي حتة فكره .... هابيع الشقة ، و الغوايش بتاعة المدام ،،، دول يجيوا لهم و لا 200 الف كمان ، كده بقت عنب و زودت المبلغ و بالتالي تزيد الارباح، و ان شاء الله لما اكسب ابقى اشتري شقة و طقم دهب معتبر للمدام !!

• لا ده اكبر غلط ممكن تعمله في حياتك ،،، يا راجل يا طيب ، فيه حد في الدنيا يبيع اصول ، علشان يستثمرها !!!

• طب و ايه المشكلة ؟؟

• اقولك ايه المشكله .... عارف فلان الفلاني ... اهو ده عمل زي ما انت عملت ، و باع حتى باب الشقة ، و دخل في البورصة ، و اهو زي ما انت شايف ،،، بعد ما كان كسب قد كده ، انهارت البورصة من 4 شهور و اتخرب بيته و حتى شقة تلمه هو و عياله مافيش ،و مراته خلعته ، و اديك شايفه اهو واقف بيبيع مناديل على المريوطية

• هو دخل في البورصة ، انا هادخل في الصناديق ، الخطورة تختلف!

• اه تختلف نسبيا ، لكن لمعلوماتك في انهيار 2006 كننا بنخسر 7% كل اسبوع في الصناديق ، و بين نارين ، نخرج و نستعوض ربنا ، و لا نكمل علشان نعوض ، و ماحدش كان عارف يعمل ايه !!!

• ياه 7% في الاسبوع؟

• اه وحياتك و احيانا كانوا 10% ، و من نص فبراير لغاية اواخر يوليو و احنا على الحال ده ، فين على ما جه اغسطس و بدأنا نشم نفسنا ..... شفت بقى كنت باقولك ليه احجز مقدما مبلغ يكفي التزاماتك لمدة سنه !!!

• اه فهمت ، كده ما اضطرش اسحب الجزء البسيط اللي فاضل بعد الخسائر على امل ان يرتد السوق في يوم ما

• اه ، لانك لو سحبته يبقى خلاص استعوض ربنا في اللي راح ، و هاتصرف اللي سحبته و تبقى على الحديده

• تمام كده ، ماشي معاك يا باشا ،،، كمل كلامك

• يبقى تدخل ب اقصى حد 40 % ماشي ؟

• خلاص هي صورة ؟؟؟ عرفنا ... 40 % ..... هانغنيها و لا ايه ؟

• حلمك عليا بس ، و مش بس كده ... بيع اصول ... ايه ؟؟؟؟؟؟؟؟؟

• مافيش

• الله ينور عليك ، طب ايه رأيك تبيع العربية ؟

• لا خلاص ما انا فهمتها ، برضه مافيش ... الا لو كنت غاوي ميكروباصات و توكتوك

• تمام كده ، انا كده حاسس انك فهمت انا عاوز اقول ايه ... طول ما فيه مخاطر .... أمن نفسك ... غير كده تبقى بتلقى بنفسك للتهلكة !!

• طيب فيه حاجه برضه عاوز اسأل عليها

• قول يا سيدي

• اشتري في انهو واحد ، دول 40 صندوق ..... اعمل حادي بادي ؟

• لا

• امال اعمل ايه ؟

• بص يا سيدي ، الصناديق عندنا مفتوحة و مغلقة ، عاوز انهي ؟

• يعني ايه مفتوحة و مغلقة

• المفتوحة تقدر تشتري و تبيع فيها زي ما انت عاوز من البنك المصدر للوثيقة ، لكن المغلقة بيتم التداول عليها في البورصة

• خلينا في المفتوحة ربنا يفتحها علينا يا راجل ، مغلقة ايه و بورصة ايه بس!

• طيب ، خلينا في المفتوحة ... برضة متقسمة حسب مستوى الخطورة بتاعتها ، عندك ابتداء من عائد يومي تراكمي ، مرورا بالصناديق المتوازنة ، و اخير صناديق الاسهم

• اه قريت الكلام اللي انت قلته و فهمته و عارف الكلام ده

• طيب هاه .. اخترت منه ايه ؟

• شوف ،، المبلغ اللي معايا انت أساسا شلفتطه خالص ، و ما عادش منه غير 40 الف ، خلينا في صناديق الاسهم و يا صابت يا اتنين عور ، خاصة اني شايف السوق عامل ارقام قياسية

• و ماله ، اختيار مش غلط ، انت جرئ و ده يناسبك ، لكن فيه غيرك اكثر خوفا و اقل طمعا و هايعوز الصندوق المتوازن و هو برضه مش غلط ، انت مغامر و هو حريص و انتم الاتنين صح ، لكن عاوزك تعرف ان الماضي ليس بالضرورة يتكرر ، يعني ممكن سيادتك تدخل من هنا و السوق ينزل من هنا

• ده يبقى حظ ايه ده ، يعني تيجي عليا وتبتدي الخساير ، ليه وشي نحس للدرجة دي؟؟؟

• لا ، كل سوق بيطلع شوية و ينزل شوية ، مالوش دعوه بوش سيادتك اللي شبه "ريكي مارتن" ده

• و ماله ، حتى لو افترضنا ، ما احنا مأمنين نفسنا 100% اهو ، يعني نقايس و خليها على ربك

• شفت بقى فايده انك مش داخل بكل فلوسك ... اديك بتتكلم بقلب ميت ، مع انك اجدع واحد بيجري في الخناقات

• و بعدين بقى؟؟؟ ... خلينا في موضوعنا ...

• طيب انت اخترت خلاص صناديق الاسهم

• اه ، بس فيه سؤال محيرني ، قبل ما ندخل في الجد

• اتحفني يا سيدي

• صناديق العائد اليومي التراكمي دي ، معمولة ليه ؟ دي يا دوب بتجيب زي الوديعه و يمكن اقل !! دي بقى ايه حكايتها

• دي معمولة للناس اللي تتوفر معاها سيولة كبيره لفترات قصيره ، 10 ايام مثلا ، ما يعرفش يعمل فيهم وديعه ، يقوم يحطها في الصناديق دي ، لغاية ما تفرج و ياخد الفلوس تاني يعمل بيها اللي هايعمله ، انا شخصيا كنت لما باخرج مؤقتا من الصناديق بادخل فيها ، و ارجع تاني للصندوق بتاعي لما احب ، لان الصناديق دي ممكن تسترد و تشتري فيها يوميا ، و تاخد فايده حتى على يوم واحد ، لكن لو ناوي تخليهم فترات كبيره ، اعملهم وديعه و لا شهاده احسن !!

• طب خلاص نخش في الجد ، هات اللي بعده ، اختار ازاي من صناديق الاسهم ؟

• ادخل المنتدى و حمل اخر تقرير ل Eima

• ايه التقرير ده ؟

• ده تقرير عباره عن جدول ، فيه كل الصناديق اللي عندنا ، مترتبين حسب نوعهم ، و بيقولك كل صندوق حقق ارباح قد ايه ، خلال اسبوع – شهر - من بداية السنه حتى اليوم – سنه – سنتين – لغاية 6 سنين

• و اعمل ايه بقى بالتقرير ده ؟

• يا بني ادم افهم ,.... هو انت لو عاوز تستثمر ، مش لازم تعرف هاتشتري في صندوق اداؤه كويس و لا اداؤه وحش ؟

• لا مش عاوز اعرف ، انا عارف ان البنك الفلاني ده اجدع بنك في مصر ، هادخل في أي صندوق عنده و خلاص

• غلط

• ليه بقى ؟

• لان اداء الصندوق مالوش دعوه بالبنك المصدر له ، البنك بيبيع لك و يرجعلك فلوسك و خلاص ، المهم اداء مدير الصندوق

• اه فعلا انت قلت الكلام ده قبل كده ، بس كنت باقرأ و انا باكل ساندوتش و باعمل شات و مخدتش بالي

• لا خد بالك ، ده مش تهريج ، ده استثمار ، صحصح معايا خلينا نخلص الليله دي

• كلي آذان صاغية

• تجيب التقرير .... ماشي؟ ..... ، و تفتحة و تبص على صناديق الاسهم ، وتشوف انهو صندوق محقق عائد كويس خلال فترات زمنية طويلة ، يعني مش مهم اخر اسبوع عمل ايه ، المهم يكون طول عمره شغال في المعقول

• طيب نفتحه سوا ،،، محسوبك ما بيعرفش انجليزي قوي ، انت عارف ان اللغه الاولى بتاعتي سيريلانكي

• طيب نبقى نفتحه سوا بعدين ، علشان الساعه داخله على اربعه و نص ، و انا لازم انام علشان مسافر يوم السبت ، اشوفك بأذن الله لما ارجع يوم 15 نوفمبر

• انت فلقتني ، كل كام يوم مسافر.. مسافر ... انت ايه ... عاملي فيها ابن بطوطة

• لا وحياتك .... بس ده شغلي و اكل عيشي ، الصناديق استثمار..... و ليست وسيله لكسب المعايش ... مهما كنت تكسب منها ....، خليك فاكر المعلومة دي هاتنفعك بعدين ، خليني اروح

اخلص شغلي و ارجعلك ، ادعي لي ......... لاني محتاج دعواتك

- لن تغنيك الصناديق عن وسيلة لكسب الرزق ، ابد ا ، فهي وسيلة لبعض المكسب (أو الخساره لا قدر الله ) نتاج استثمار مبالغ فائضة عن الحاجة اليومية ، و ليست عملا ، لذا... مهم جدا .... ، صحح اوضاع العمل ليصبح هو مصدر اكتساب الرزق.

لاقدر الله ممكن ندخل في موجه هابطة ، عندها ستظل الصناديق لشهور وسيله للخساره ، فماذا سنفعل عندها ؟

2- لن استطيع الحكم بدقه على الاهلي الخامس ، فهو جديد و اداؤه لا زال غير واضح

3- من الصناديق التي سألت عنها ، ارشح لك الاهلي 1 او 3 ، فهم اكثر وضوحا ، فقط لاحظ ان الاهلي 1 له عمولة شراء 1% و الاهلي 3 ليس له عمولات و كلاهما متوازن يناسب ما ذكرته من ظروف حالية.

4- في كل انواع الصناديق المرتبطة بالبورصة ، و ليس في نوع محدد ، نحاول ان يكون الدخول الجديد بعد تصحيح السوق ، و الخروج يكون عند استمرار الخساره لمدة سابوعين متتاليين ، مع الغموض و التردد في اداء السوق ، و لا تظهر في الافق علامات انتهاء الهبوط ، نخرج حتى نرى اسبوع صعود قوي بعدها ندخل ، لهذا من الافضل دائما البحث عن صندوق قليل او عديم العمولة

فى النهاية اشكر استاذى البشمهندس علاء نور على تعبه فى سرد هذة المعلومات وتجميعها

وارجو من السادة الاعضاء الدعاء له بتمام الصحة والعافية وبالرزق الحلال الخير والوفير

كما ادعو لوالده بتمام الشفاء العاجل وان يرجعا من الخارج بالسلامة والعافية حيث ان الوالد فى رحلة صراع مع مرض السرطان

يا رب اتم له الشفاء العاجل