لقد قلتم لنا ان نظام الصناديق استثمار يحتاج لنفس طويل و ها نحن الان اتقطع نفسنا و الخساره كبيره جدا

من بريد بيت المال

السلام عليكم ورحمة الله وبركاته الأخ العزيز عبد العزيز كيف حالك إن شاء الله دائما بخير

لقد قلتم لنا ان نظام الصناديق استثمار يحتاج لنفس طويل و ها نحن الان اتقطع نفسنا و الخساره كبيره جدا

السؤال : هل هناك بادرة امل للخروج من هذا المستنقع و لا نسحب فلوسنا و ربنا يعوض على الخسارة ده

بجد انا من ساعة اشتراكى فى هذه الصناديق و السعر بينزل حتى لما مؤشر البورصه كان ساعات بيعلى برضك اسعار الصناديق اللى مشترك فيها كان بينزل ليه ؟ الله اعلم . رجاء الرد بصراحه و بلاش الاجابه الدبلوماسيه شـكــ وبارك الله فيك ـــرا لك ... لك مني أجمل تحية .

-----------------------------------------------------------

اخي الحبيب

تعالي بتكلم مع بعض بصراحة و ببساطة كالعادة ..... "مع التاكيد ان مافيش حاجة من اللي ها اقوله تعني اي نصيحة بيع او شراء او إحتفاظ لاي اخ من اللي معانا في المنتدي ...."

انا بس ها اعلق علي كلامك لو سمحتلي و كل واحد حر تماما في قراره.

1:اخي الحبيب صحيح انا قلت ان الإستثمار في صناديق الإستثمار و البورصة عامة يحتاج لنفس طويل و صبر ده صحيح ..... طيب تعالي نتناقش ... في صندوق مدته 20 عام تعتقد جملة النفس الطويل و الصبر تعني مدة زمنية قد ايه ؟؟!!

يا اخي لو افترضنا ان انتا دخلت في اعلي نقطة للسوق و الصناديق في اول مايو يعني بقالك 5 اشهر ... من مدة حياة الصندوق اللي هي 20 سنة * 12 شهر = 240 شهر يعني بتتكلم في 2-3 % من مدة حياة الصندوق .... مش معايا انها فترة قصيرة جدا للحكم علي الإستثمار؟

2: موضوع خسارة كبيرة و مكسب كبير ده ما تقدرش تقوله غير لما تبيع فعلا الوثائق

يعني طول ما انتا معاك الوثائق انتا ولا كسبت ولا خسرت ...

اقولك حكاية حلوة سمعتها من راجل كبير " يبقولك مرة واحد بلدياتنا نزل القاهرة ... لقا الناس واقفة ادام محطة مصر بتبيع كل حاجة ممكن تتخيلها علي الرصيف ... وقف الراجل و بذكاء فطري شديد قرر يتاجر و يبيع و يشتري هو كمان ... اعد يدور معاه علي اي حاجة يبيعها مالاقاش ... اخيرا اهتدي الي انه يفرد الشال بتاعة علي الارض و قام منفض جلابيته علي الشال و جمع كل البراغيت " البرغوت حشرة قارضة تستوطن ابدان المصريين في القري و النجوع منذ الاف السنين ... حقيقة علمية ... مع تحيات رجل المستحيل " اللي نزلت من الجلابية و وقف يبيع البرغوت بجنيه .. البرغوت بجنيه ... الناس افتكرته اتجنن لكن ولا همه و وقف يبيع لغاية ما جه واحد و حب يشتري بس فاصل معاه و واحد تاني و تالت و هو مصر ان البرغوت بجنيه ... و اخر لما زهق منهم لم البراغيت و قالهم ايه هيا نهيبه ولا ايه ... انتو فاكرين مانيش لاجي اوكلهم ولا ايه ؟!!!

العبرة من الحدوته انك طالما عارف قيمة بضاعتك و عارف انها تساوي اكتر من السعر المعروض ما تبيعش ابدا بخسارة إلا لو محتاج ....

3:لو انتا زي ما بتقول من اول اما اشتريت و السعر بينزل يبقي انتا اشتريت في وقت خطر و لا بد انك تتحمل نتيجة القرار و ذلك بانك تختار بين امرين احلاهما مر زي ما بيقولو

ا: انك تبيع بخسارة

ب: انك تستنا محبوس لغاية ما السوق يلف و يرجع تاني او علي الاقل يقلل خسارتك لاقل قدر .

4:لو انتا اشتريت في صندوق ادائه ضعيف برضو دي غلطتك و كان لازم تذاكر كويس قبل الشراء

انتا عندك تقارير الاداء الاسبوعي و الشهري و كمان تقارير إما المجمعة كلها و فيها ها تلاقي صناديق ممتاذة ادائها يفوق المؤشر في معظم الاحيان.

5: اللي اتزنق في فلوس او اتخذ إجراء تحوطي خشية انهيارات جديدة و باع الاسبوع ده ربنا يعوض عليه إن شاء الله و احب اقوله ان قرارك باي دافع من الاتنين كان قرار سليم و منطقي و تذكر ان خسائر البورصة لا تعوضها إلا مكاسب البورصة "وداوني باللتي كانت هي الداء" ... ما تزعلش علي اللي راح و اتعلم منه في اللي جاي

6: اللي السا محتفظ إن شاء الله يعوض جذء كبير من هبوط الاسبوع اللي فات في الاسبوع ده

السوق بيرد كويس اهه بقاله يومين ربنا يسهل و يكمل كده لاخر الاسبوع و ها نشوف ارقام كويسة إن شاء الله في الوثائق "ملاحظة : السوق دائما ليس بالطيبة انه يخبرك في اي اتجاه سيتجه ... يعني الطلعة دي ممكن تكون بداية طلوع كبير او تكون ردة كفرصة للخروج باقل خسارة قبل ما نكمل تحت او نتعرض لفترة سكون لفترة من الزمن .... فكر كويس قبل اي قرار"

7: نصائح سريعة للتعامل في البورصة من اخ لاخوه

ا) ما تبيعش حاجة بزهق ولا تشتري حاجة بطمع.

ب) ما تلعبش في البورصة غير بفلوس مش محتاجها لمدة سنة علي الاقل.

ج) اللي خسرته في البورصة ها تعوضه من البورصة.

د) مافيش في البورصة فرصة ما بتتكررش المهم تكون موجود و جاهز لما الفورصة تجيلك

ه)لو كان 6 - 7 قرارات بيع و شراء من اللي بتاخدهم في البورصة قرارات سليمة يبقي انتا راجل جامد جدا.

و) التاريخ و الإقتصاد بيقول ان البورصة هي اكبر مجال إستثماري مشروع في العالم من حيث حجم العوائد علي المدي الطويل

اظن كده انا جاوبت علي كل الاسئلة

و لو حد من الاخوة ليه اي تعليق يسعدنا التناقش معه لتعم الفائدة إن شاء الله.

و لا تنسونا في صالح الدعاء

اخوك عبد العزيز البغدادي