نقاش حول حساب قيمة وثائق صناديق الإستثمار

من بريد بيت المال

السلام عليكم

ا / عبد العزيز .. تحية طيبة ودعاء بأن يجزيك الله خيرا

وبالنسبه للي حاصل في السوق ف ربنا يعوض ان شاء الله ويكرمنا جميعا

فيه نقطتين عايز اسأل حضرتك فيهم

- دلوقت بالنسبة لصناديق الاستثمار ايه اللي بيحدد سعر وثيقته من اسبوع للتاني ؟ الوثيقة دي المفروض بالبلدي كدا الصندوق الاسبوع خلص وهو شاري في اسهم س ، ص ، .... والاسهم دي قيمتها كذا تقسمها على عدد الوثائق المطروحه يطلع نصيب كل وثيقه اللي هو سعر الوثيقه .. مش كدا ...

طيب مثلا في جلسة امبارح والنهارده والسوق نزل جامد وابتدى يرد وشوفنا اسهم طلعت بال 60% مش المفترض ان ادارة الصندوق الواعية عملت تبادل لمحفظتها وحققت مكاسب ؟ والمفروض المكاسب دي تظهر لنا في سعر الوثيقة ؟

اقصد يعني .. انه مش معنى ان السوق نازل ان سعر الوثيقة ينزل ممكن السوق ينزل وادارة الصندوق تبقى في حركة بيع وشراء دائم تبيع غالي وتشتري ارخص فتمتلك كم من الاسهم اكبر فعلى اخر الاسبوع حتى لو سعر السهم اللي في ايد الصندوق نازل مع السوق .. الا ان الصندوق زود الكمية ؟؟

نقطة بس استوضحها منك .. هو ينفع الصندوق في فترة يحتفظ برأس المال وميشتريش اسهم لو شايف السوق ميشجعش فيحتفظ بقيمة الوثيقة ويتعامل زي المستثمر الفرد ويطلع من السوق وهو عالي ويخرج خالص من السوق في حالة الهبوط للسوق كله زي دلوقت ؟؟ ولا فيه لوايح تلزمه بالتواجد في السوق ؟؟

-------------------------------------------------------------

اخي الحبيب

اسمحلي الاول احييك علي تفكيرك المنطقي و تحليلك العقلاني لحركة الصناديق و طرق حساب الاسعار للوثائق ... تعالي كده نفك الموضوع حتت صغيره و نشرحة بالبلدي برضو زي ما انتا قلت.

اولا: طريقة حساب السعر للوثائق زي ما حضرتك قولت نظريا سليمة لكن عمليا الواقع غير كده شويتين ليه ؟؟!!! اقولك

محفظة الصندوق الإستثمارية بتكون مقسمة الي او 4 اجذاء او 5 اجذاء نسبة كل منهم للاخر لا يعلمها إلا مدير الصندوق ... الاجذاء هي

1: اسهم إستثمار طويل الاجل و دي اللي الصندوق بيدخل فيها و مديره مش بيفكر في الخروج منها ابدا إلا لظروف كارثية للصندوق او الإقتصاد او الشركة نفسها.

2: اسهم استثثمار سريع و فرص خاطفة و غالبا دي احد اسباب تفوق صندوق علي الاخر في نسب الارباح

3 : سندات حكومية و اوعية استثمارية محدودة المخاطر

4: سيولة مجنبة لتلبية طلبات الإسترداد من حملة الوثائق و تغطية الكوبونات.

5: سيولة مجنبة لإقتناص اي فرص إستثمارية تظهر في السوق

و من العرض السابق يتضح لك ان قيمة الوثيقة لن تكون عمليا هي حاصل قسمة قيمة اسهم الصندوق علي عدد الوثائق.

ثانيا" : إدارات الصناديق الواعية فعلا بتعمل تبديل للمراكز و تغيير في اسهمها و نسب كل سهم من المحفظة بشكل مستمر لكن لاحظ

1: محدش بيعرف يشتري في اقل سعر و يبيع في اعلي سعر حتي مديرين الصناديق و المحافظ

2: حركة الشراء و البيع في محافظ الصناديق بتكون ابطاء منها مع الافراد لان الفرد ممكن يعمل ميت عملية بيع و شراء ولما تسئله عملت كده ليه يقول اي كلام منطقي او مش منطقي مش مهم لكن الصندوق لازم يكون دارس كل خطوة و عنده مبررات و اسانيد فنية و إقتصادية لكل حركة " او هكذا يزعمون"

3: الاسهم اللي نطت دي ممكن ما تكونش في محفظة الصندوق اصلا او مش مسموح له يتعامل فيها زي اسهم البلالين و الاسهم اللي عليها شبهات شرعية مثلا.

4 : لو سهم ب 1 جنيه نط عمل 100 % ها يبفي بكام في المحفظوة 2 جنيه ؟؟!!! انما لو سهم من ابو 300 جنيه نزل 50 % بي ها ينزل 150 جنيه من محفظة الصندوف مرة واحدة لكل سهم ... يعني اسهمك مش زي بعض و مش اي سهم يبقي سهم.

ثالثا: طبعا مش معني ان السوق نازل ان كل الوثاق تنزل و العكس صحيح و ده شفناه في اكتر من اسبوع قيل كده كان وثائق بعض الصناديق بتخالف إتجاه و نسب تحرك المؤشر لكن ده في النزول و الصعود الطبيعي الطفيف مش في ضرب النار و الحرب النووية اللي حصلت الفترة اللي فاتت

رابعا:طبعا ما ينفعش اي صندوق او مدير محفظة يسيل 100 % من اسهمه و يقعد جنبهم يسقع قلل ... الإستثمار الصح بيقول ان حتي و السوق نازل بتكون فيه فرص إستثمارية جيدة حتي ولو علي المدي الطويل لا بد من إقتناصها ... و طمان ما تنساش ان فيه مديرين صناديق مقفول عليهم في اسهم كتير زينا و لابسين اسود كمان.

اتمني اكون رديت عليك بشكل افادك

اخوك عبد العزيز البغدادي