قهوة البورصجية

معرفش اذا كان حد فاكر اخر حلقة من القهوة من عدة اسابيع ولا ايه ؟ عموما ملخصها معلم القهوة قفل النوتة ومنع المشاريب علي النوتة وطلب من الناس تسدد مديونياتها واعطي البسارية من رواد القهوة مهلة قبل بيع ملابسهم بالمزاد - البعض اقتنع وصفي مديونياته وقعد باله رايق والبعض لم يقتنع وواصل الطلب علي النوتة - الكريديت - وقال مش حنسلم ......مش حنبيع ..... مش حنوافق عالتركيع وده حال السوق ناس بتقول طالع وناس بتقول نازل واللي بيكسب النهارده حيخسر بكره والعكس بالعكس مفيش حد كسبان علي طول وصح علي طول ومافيش حد خسران علي طول وغلط علي طول

انتم طبعا عارفين انني خدت القرشين ودفعت المتأخرات للمعلم ولو اني ما لحقتش التي شرت المقلم بتاعي اللي كان من نصيب الاخت جينا وطلعت علي سويسرا بالباقي ابعترهم بدل ما يضيعوا في البورصة ... عموما انا في سويسرا مش محتاج تي شرت كفاية الشورت البرمودا واحيانا مش بحتاجه هو كمان

ما طولش عليكم وانا قاعد علي بحيرة لوزان باصطاد سمك ملون وبأشرب حلبة حصي سويسري بفتلة لقيت الواد كراوية بتاع القهوة جاي جري وقالي

الواد كراوية : الحق يا أستاذ بسارية ياغلبان المعلم طلبك ضروي في القهوة لحسن في خناقة جامدة قوي والدم حيبقي للركب

بسارية الغلبان : يا واد ياكراوية انت جاي من مصر جري .....اهو اخواننا في الجروب مش حيصدقوا حيقولوا عليا اهو ابتدي يهجص من اولها

المهم اخدت اول طيارة خاصة علي مصروركبت اول توك توك لقيته وجري علي القهوة لقيتها مليانة علي اخرها رحت علي طول للمعلم ودار الحوار التالي

بسارية الغلباان : ايه العالم دي كلها يامعلم ماشية معاك الشغل نار

معلم القهوة : ياشيخ اتنيل - دي خناقة يابسارية سيد الطالع جاي قرايبه من الكوم الاخضر وسلامة الواطي جايب اهله من الدرب الاحمر وناويين يقلبوها دارفور

بسارية الغلباان : ليه كده بس يامعلم هو موضوع ثأر ولا ايه

معلم القهوة : ابدا سيد الطالع وبتوع الكوم الاخضربالمطاوي والسنج بيقولوا السوق حيخضر محدش يبيع وسلامة الواطي وجماعته بتوع الدرب الاحمربالشوم والسيوف بيقولوا السوق حيحمر و رايح في داهية ومحدش يشتري

بسارية الغلباان : طيب لو الناس سمعت كلام دولهم محدش حيبيع ولو سمعوا كلام دوكهم ما حدش حيشتري والبورصة تقفل بقي والكل يروح بيته طيب والحل يا معلم

معلم القهوة : انا بعت اجيب حكم اجنبي من لندن سير وليام سميث انت طبعا عارفه ومعاه الاستاذ نبيل صندوق مدير محفظة كبيرة قوي والاستاذ توفيق السكري مدير معمل تحاليل مالية وفنيه يفضوا الخلاف ويقولوا لنا السوق طالع ولا نازل

فجاءة دخل علينا شكري قباحة مش لابس حاجة خالص الا حزام ناسف وهو بيقول ......شوفوا حل في الموضوع ده طالع ولا نازل انا شاري الحزام ده كريديت وافجركم كلكم اذا ما قولتوليش طالع ولا نازل واشتري ولا ابيع

بصراحة انا خفت ورحت اقعد مع جماعة من البسارية بتوع زمان وقعدت ادردش معاهم

زكي ودن الفيل : ازيك ياواد يابسارية انت خلعت علي سويسرا والدنيا ولعت نار

بسارية الغلبان : ليه يا زكي ماأنت اتشعبطت في سهم من بتوع قعر الحلة وعملت لك 50 الميه مكسب في يوم بعد ما سمعت توصية من اللي هم

زكي ودن الفيل : يا ساتر يارب علي عينك ماهم علي التسوية نزلتهم تاني وصاحب التوصية قالي حتطلع تاني واستنيت لحد السهم ما قفل علي صباعي وبقي ثلث تمنه

بسارية الغلبان : طيب ما تروح له تسأله تعمل ايه ؟

زكي ودن الفيل : ما أنا رحت وقالي انا خسران زيك بالضبط وبعدين قالي انا بطلت توصيات بقول دلوقت نكت بس - سمعت اخر نكته

بساريه الغلبان : وانت ياصبري زعلان ليه ده انت اسرع واحد يلحق نفسه في البورصة

صبري الحق نفسك : انا بصراحة اشتريت سهم توصيات ميه المية بعشرين جنيه وبعته بثلاثين جنيه وعملت قرشين ولما دخلت في الحديد والصلب علي 68ج قفل علي صباعي وبقي 34ج وضاع مكسبي اللي فات ومعاه نص فلوسي مش عارف ابيع ولا اصبر ولا ايه

نزيه ابو بصيرة : كله من الحكومة جابت داغ السوق لما ما عرفتش تبيع بنك القاهرة

زكي ودن الفيل : طيب ده ممكن يؤثر علي البنوك طيب باقي الاسهم مالها

نزية ابو بصيرة : البركة في ساويرس اللي لهط فلوس اسهم خزينة تليكوم لوحده اول مرة ولما الناس عرضت اسهمها تاني مرة خد 3% بس علي 83ج والناس نزلت حدف في السهم لحد ما بقي 56ج

صبري ابو بصيرة : ياجماعة الراجل طيب وحيبتدي يلم الاسهم الوقيع من السوق علشان تنبسطوا

زكي ودن الفيل : انا نفسي بس اعرف السيولة فين والناس مش عايزة تشتري ليه ؟ ايه اللي جري ؟ يعني كانوا بيقطعوا بعض علي المنتجعات ب 12ج ومش راضيين به اقل من 5ج وبشتموا بعض علي تقرير هيرميس بتاع مصرالجديدة ابو 1500ج مش عايزينه ب 350 ج فين الصدق وفين الكذب

صبري الحق نفسك : السوق مليان اسهم بسعر التكلفة بس اللي معاه فلوس خايف تنزل اكثر واللي ما معاهوش نفسه يشتري بس منين ياحسرة

صبري ابو بصيرة : الاكتتابات في الباي باي - الوطني للتنمية في السوق اقل من الاكتتاب والقاهرة للاسكان السهم ابو 35ج بقي 8ج ومطلوب لكل سهم سيولة 20ج علشان الاكتتاب طيب الناس تجيب منين ؟

زكي ودن الفيل : اسهم الاكتتابات بس - ده كله وقع علي بوزه قيادي ولا مش قيادي وش الحله ولا قعرها اللي نفد هو الانشا بس والباقي الله يرحمه

بسارية الغلبان : ده بيتهيأ لك مفيش اكتتاب بيفشل لانهم دائما بيعرفوا يلموا فلوس الاكتتاب يا أول مرة يا تاـي مرة وكل وضع بيكون مرسوم ليستفيد منه المحظوظين اياهم

زكي ودن الفيل : طيب ما تطلع ياواد يابسارية القرشين من تحت البلاطة وتحرك لنا السوق شوية

بسارية الغلبان : بصراحة بعض الاسهم اسعاره الاقل في 3 سنوات يعني اوكازيون مفيش كده انما انا بأعمل قائمة بيضا وقائمة سودا وبأشتري فعلا علي مراحل

سلامة الواطي: احنا مش قلنا ما حدش يشتري والا حنجيب كرشه السوق رايح في داهيه يا بقر وبعض المحللين بيقولوا 8200 ولا يمكن 2800 مش فاكر

بسارية الغلبان : ما هو انا حشتري من القايمة البيضا بس مش القايمة السودا يا مستر سلامة وناوي لما اخلص شراء اروح سويسرا تاني استني الفرج

سلامة الواطي : ما الاسهم كلها بقت قايمة سودا

بسارية الغلبان : لا يا ريس في اسهم في اسعار حلوة او رايحة لاسعار حلوة ما تتسابش لانها حتلف وتطلع حتي لو السوق ريح

زكي ودن الفيل : طيب واللي ما عندوش سيولة يعمل ايه ؟

انتهي الجزء الاول - الجزء الثاني غدا يحتوي علي مناقشات طقم الحكام وقرارهم السوق طالع ولا نازل وتفاصيل القايمة البيضا

الحمد لله....شريف مرسي

منقوووول

ابداع جميل للاخ شريف