لي استسفار .. على اي اساس يتم احتساب سعر وثائق صناديق الاستثمار ؟؟

الحقيقة السؤال التالي ورد الينا من احد الاخوة و لتعم الفائدة قررنا نشرة في بيتكم بيت المال

السؤال كان كالتالي

لي استسفار .. على اي اساس يتم احتساب سعر وثائق صناديق الاستثمار ؟؟ مؤكد حسب سعر وحركة الاوراق اللي الصندوق مشتري فيها .. تمام ؟؟

بس بلاحظ اوقات بتبقى البورصه نازله والصناديق متأثرتش وممكن تزيد والعكس ساعات بيحصل ..

؟؟

مثلا الاسبوع دا معظم الصناديق نزلت ما عدا الحصن ؟؟ ليه ؟؟ يا ترى فين الشفافيه والمصداقيه .. يعني فيصل نزل ودا كان متوقع .. واتوقع انه الاسبوع اللي جي هيعلى جامد اما الحصن فحاسس انه منزلش " جر رجل " والاسبوع اللي جي لو فيه زياده مش هتبقى عاليه عشان يوازن

 

رد بيت المال

اخي الحبيب

  يتم إحتساب سعر وثائق صناديق الإستثمار بقسمة القيمة الإجمالية لإجمالي محفظة الصندوق علي العدد الكلي للوثائق في الصندوق يعني لو الصندوق محفظته تتكون من مجموعة من الاسهم مثلا سهم س عدد الاسهم 10 بقيمة 10 جنيه للسهم بعد اقفال اليوم الاخير للتداول في الاسبوع اللي هو الخميس في اغلب الاحوال يعني قيمة السهم س ده في المحفظة =10* 10 = 100 جنيه و ده كمان ينطبق علي كل الاسهم اللي في المحفظة حلو كده

يبقي لو افترضنا ان السهم س قيمته 100 جنيه و ص قيمته 50 جنيه و ع قيمته 200 جنيه و هما دول اللي بيشكلو المحفظه يبقي قيمة المحفظه = 100 + 50+200 = 350 جنيه مثلا

طيب الصندوق ده كان فيه كام وثيقة مثلا 100

يبقي السعر الاسبوع التالي هايكون 350 / 100 = سعر الوثيقة الواحدة 3.5 جنيه

حلو كده .......... تمام نكمل

امال ليه البورصه بتكون ماشية في حتة و الصندوق ده او مجموعة الصناديق دي ماشية في حته تانيه ؟ ده سؤال جامد جدا بس عشان نجاوبه لازم نتفق عل شوية حاجات

1: الصناديق تختلف خططها الإستثمارية حسب طبيعة كل صندوق يعني فيه صناديق تميل اكثر إلي المخاطرة التي يقابل ها معدلات مكسب و خسارة اكبر و هناك صناديق تميل إلي التحفظ في إستثماراتها و التي يقابلها ايضا معدلات ربح او خسارة اقل

2:طبيعة إستثمارات كل صندوق تختلف عن الاخر يعني فيه صناديق محافظها تتكون من الاسهم بنسب كبيرة و دي اللي بترتبط اكتر بالبورصة في حركتها عكس الصناديق اللي بتتكون محافظها بنسب كبيرة من السندات و اذون الخزانة و دي اللي بتكون درجة ارتباطها و كمان مكاسبها قليلة مقارنة بالبورصة

3: لازم الاول تقول هيا ايه البورصة بالنسبالك ؟ هل هي المؤشر؟ هل هيا الاسهم الللي شاري فيها الصندوق ؟ هل هيا الاسهم اللي انتا مهتم بيها؟

لان المؤشر لا يعبر بشكل كامل عن كل اسهم البورصة لانه يتكون من ال 30 سهم الكبار بس

يعني لو الاسهم الكبيرة دي بتنزل المؤشر كمان ها ينزل حتي لو كان الاسهم التانية طايرة و عامله مكاسب كبيرة و العكس صحيح

و بناء علي كل ماسبق فدرجة ارتباط الصندوق بالسوق تعتمد علي اكثر من عامل زي ما قلنا ده طبعا ده لو تخلينا عن نظرية المؤامرة.

3:اما موضوع ليه ده نزل الاسبوع ده اكتر من دول او ليه ده الاسبوع ده طلع اكتر من دول فده علي رئي اخوتنا الازهرية موضوع اختلف عليه الائمة يعني من الاخر محدش يقدر يجاوبك عليه غير مدير الصندوق نفسه لان هوا الوحيد اللي عارف محفظته فيها ايه دلوقتي و هوا اللي حسب حسبة صندوقه اللي محدش يعرفها غيرة

لكن نصيحتي الشخصية لو حابب تعرفها

1: انتا و احنا داخلين الصناديق عشان نريح دماغنا من وجع القلب بتاع البورصة فكل اللي مطلوب منك انك تنقي صندوق جيد و مدير إستثمار جيد و تشتري و تنتتظر و تراقب بهدوء و صبر.وتذكر ان المستثمر الناجح هو من يعتمد في إدارة إستثماراته علي اشخاص اكثر منه علم و ذكاء ليتفرغ هو لخلق فرص إستثمارات جديدة او لعب الجولف (ده طبعا لو ليك في الجولف)زيي كده

2: الصناديق إستثمار طويل الاجل عاوز واحد هادي و اعصابة جامده.

3: ماتحاسبش مدير صندوقك اسبوع باسبوع الصناديق زي الشركات بتتعامل معاها في المحاسبة بالربع سنة علي الاقل او بنسبة مئوية للخسائر.

4:مش مهم مين طلع الاول الاسبوع ده المهم مين اللي بيطلع الاول الربع ده و السنه دي.

بس يا سيدي طولت عليك انا عارف بس يا رب اكون افدتك