اراء و تفسيرات عن ما حدث للصناديق هذا الاسبوع

هذا الموضوع هو موضوع مجمع لبعض مشاركات الاخوة في احد المنتديات حول ما حدث في اسعار الصناديق الإستثمارية المصرية هذا الاسبوع و ذلك بهدف وضع جميع التصورات و السيناريوهات التي قد تمكننا من فهم ما حدث و تجعلنا قادرين علي ان تبني قراراتنا الإستثمارية المستقبلية علي اساس اقوي و قناعة شخصية كاملة

وجهة النظر الاولي في الموضوع بتقول

ان التباين اللي حصل في اداء الصناديق بين إرتفاع طفيف للبعض و ارتفاعات قوية للبعض الاخر لهذا الاسبوع 09 مارس 2008 كان سببة كالتالي و الكلام هنا علي صندوق الامان تحديداً

 لو شفنا اللي حصل في جميع البورصات العالمية في الأسبوع الماضي وخاصة في آخر الأسبوع هنلاقي حدوث تراجعات كبيرة في جميع البورصات بلا استثناء سواء الأمريكية أو الأوربية أو الآسياوية والسبب كان أزمة الرهن العقاري الأمريكية اللي عمملت مشكلة من فترة برضه في شهر يناير اللي فات . يبقى المتوقع هو تأثر السوق عندنا بكرة الأحد وممكن يمتد على مدار الأسبوع علشان كده كان مدير الاستثمار للصندوق له نظرة إلى الأسبوع القادم وخوفه من بيع العملاء للوثائق والعودة للشراء بعد اتهاء الأزمة زي ما حصل قبل كده والعملية دي بتعمله خسائر في الصندوق طبعاً فقرر أنه ما يرفعش السعر جامد على أمل تقليص هذه الخسائر في حال انخفاض السوق وزيادة الأرباح في حالة ارتفاع السوق . والله أعلم وربنا يستر علينا الأسبوع الجاي مع العلم أني بميل إلى الخروج من الصناديق بكرة ولو حتى بنسبة 50% على أقل تقدير علشان نبقى مسكنة العصاية من النص .

و بناء علي الرئي ده ظهر سؤال بيقول الاتي

بناءا على كلامك من المرجح تراجع أداء المؤشر بعدما وصل لما يقرب من 11400نقطة ويحدث تراجع عنيف كما حدث بنهاية يناير وخصوصا أن الحالة متشابهة .يعنى من الآخر نركب الموجه و نبيييييييع بكره تحسباً لتراجعات عنيفة لكن هل توجد دلالات واضحة على التصحيح المرتقب؟؟؟

و قام بالرد عليه اخونا الاول  بالرد التالي

مافيش حاجة اسمها دلالات أو تأكيد لأن ماحدش يعلم الغيب إلا الله عز وجل كل اللي نقدر نقوله هي توقعات قوية ومرجحة بناءً على الأحداث

و إستمر النقاش كالتالي بسؤال جديد

بس المشكله ان فى خلال الاسبوعين اللى فاتوا أسعار الوثائق كانت غير مرتبطه بأداء المؤشر ... وخصوصا فى الاسبوع ده .. فده بيخلى صعب التوقع على الواحد انه يتوقع اتجاه الوثيقه ولا أقول اتجاه السوق .. نتيجه فك ذلك الارتباط بين الؤشر او حاله السوق عموما وبين اسعار الوثائق ....فهل ممكن اننا نشوف حاجه ذى كده الاسبوع القادم كمان ؟؟ بمعنى هل ممكن ان السوق ينخفض وتظل الوثائق متماسكه او حتى ترتفع ؟؟ او هل ممكن السوق ينخفض الاحد والاثنين ثم يعاود الاتفاع بقيه الاسبوع كما يحدث كثيرا ؟؟ ام ان العمليه ستمتد لنهايه الاسبوع ؟؟حاجه تحير فعلا !!!!!

و قام احد الاخوة بالرد كالتالي

الغريب كمان اخي ان اغلب الصناديق ارتفاعاتها بسيطة بالنسبة لارتفاعات الصناديق الاسلامية خاصة فيصل والحصن التمويل السعودي اعتقد ان في شئ غريب كأن الصناديق الاسلامية داخلة سهم خاص بهم يحقق ارباح كبيرة هههههه بس زي ما قولت انه فقط احنا مش واخدين علي انه يكون اداء الصناديق الاسلامية قوي بالشكل ده لكن اخي العزيز بخصوص هبوط كبير مماثل لهبوط الفترة السابقة انا لا اتوقع حدوث هبوط رهيب يعني لكن ممكن نتأثر شوية بالاحداث العالمية لكن مش للدرجة الكبيرة اللي حصلت الشهرين الماضيين

و كان الرد كالتالي في مشاركة اخري

وبالقياس على ما سبق نجد أن السوق الآن غير مستقر ولكن هناك بعض من المحللين قالوا يوم الخميس الماضي أنهم يتوقعوا ارتفاع في الأسبوع القادم .بس دي توقعات محدش هيحاسبهم عليها وماكنش عندهم معلومات عن أداء الأسواق العالمية يومي الخميس والجمعة .وبكده كل واحد يقدر يقرر إذا كان عنده استعداد للمخاطرة والبقاء أم الخوف والخروج وفي كلا الحالتين ده بيبقى توفيق من عند ربنا وكل واحد هياخد رزقة المكتوب له . وهذا هو رأيي الشخصي وليست دعوة للخروج أو البقاء في السوق

و جاء رد تفصيلي لوجهة نظر مقابلة كالتالي

لو انت جربت قبل كده انك اول مادخلت انخفض السعر - وكان انخفاض كبير وصل الى حوالى 9 % تقريبا وكان على جميع الصناديق الى فى السوق - وأخذت بمنطق الاستمرار ولم تبيع و انتظرت وصبرت لعاد السعر اليك وحقق مكسب كمان - تمام كده

- اذا انت اصبحت صاحب تجربه جيده اثقلتك طيب لو افترضنا السوق هاينزل تانى لاقدر الله - فهل هاينزل 9 % اخرى مثلا - ويبقى كده الصناديق رجعت لاسعار 2007 ومعملتش اى صفر % حتى خلال 2008 لانها يادوب بأسعار غدا الاحد 9 / 3 / 2008 تكون محققه حوالى من 7 الى 9 % خلال 2008 - وصعب جدا جدا ينتهى مارس يعنى ربع السنه ولاتكون الصناديق حققت الـ من 10 الى 12 % - لاننا نكون خلصنا ربع السنه المفروض يكونوا حققوا اى معدلات منطقيه للصناديق خلال ربع سنه خاصة وان فيه بعض الصناديق هاتوزع ارباح وكوبونات اخر مارس - طيب هاتجبها منين الا اذا حافظوا وبقوه كشركات ادارة استثمارات ومتخصصين على اسعار الصناديق بأى شكل كان !!!!!

-علشان كده لقينا الصناديق بتتخلى عن الاسهم القائده منذ اسبوعين ولاتربط اموالها فيها وبدأوا يدخلوا فى اسهم انتقائيه لاعلاقة لها بأى تأثر بالمؤشر - يعنى المؤشر ممكن ينخفض لكن سعر الوثيقه يرتفع او المؤشر يطلع نصف % والصناديق بتزيد من 3 الى 5 % زى ماشفنا - وبالتالى اصبح هناك حلول للتربح سلكها مديروا الاستثمار

- وانا شايف انه صعب يتخلوا عن هذه السياسه وهايستمروا فيها - يعنى هايشتغلوا اكثر داخل الصاله وعلى الشاشه - واذا كنت لاتستطيع تحمل اى موجة هبوط اخرى قد تحدث ومستعجل على رأس مالك يبقى خلاص اخرج او خفف ويكون قرارك انت كاملا !!!

- اما اذا كان السوق معرض للهبوط ام لا مرة اخرى - انا مع الراى الى مكتوب فوق - بانه فيه محللين بيقولوا مرشح للطلوع واخرين متشائمين وبيقولوا معرض للهبوط لسبب او اخر - يعنى لاأتنبأ بشىء ولاغيرى يستطيع التنبؤ مطلق

اما عن رئيي الشخصي فيما سبق فهو كالتالي

اعتقد الصناديق و مديرين الصناديق عارفين موضوع البورصات العالمية و الركود الامريكي و كل القلق الخارجي ده

و عشان هما و احنا خسرنا نظريا جذء كبير من المكاسب اللي المفروض كنا نحققها لحد الربع الاول من العام فهما قررو انهم يلعبو علي المكسب اللي ها ييجي من الاسهم الصغيرة و اللي مش بتتاثر بال GDR ولا بورصات العالم

و اعتقد ان ده هوا السبب الحقيقي للي شفناه الاسبوع اللي فات من تسييل و إنخفاض في اسهم القياده و المعروفة ب اسهم المؤسسات و اللي قابله زياده كبيرة في اسعار الاسهم المحلية و الصغيرة .

يعني بالعربي اعتقد ان مديري الصناديق بتوعنا هايسيبو الاجانب يهزو في الاسهم الكبيرة اللي بيحبوها شوية فوق و شوية تحت و ها يركزو هما علي انهم يطيرو الاسهم المحلية و الصغيرة . لغاية ما الدنيا تبان و يرجعو للاسهم القيادية تاني .

ده رئيي الشخصي الذي يحتمل الصواب و الكثير من الخطاء لكن عموما ها يبان الاسبوع ده ايه الموقف.