رجاء حد يفيدنى ويفكر معايا ... سؤال جديد لبيت المال

انا اشتريت 200 وثيقه فى صندوق بنك مصر الرابع ( الحصن) الكلام دا فى شهر ابريل بعد متابعه دقيقه وقناعه ان اداء الصندوق دا كويس .. اشتريت بسعر 154.8 جنيه

و كان فى توزيع 4 جنيه بعدها

وحصل الى حصل فى البورصه لكل الناس وكل ما تنزل اقول استنى اكيد السوق هيرفع تانى

لحد ما وصلت 84.62 جنيه ..

يعنى خسرت بنسبه .. 44 % تقريبا .. فى خلال 6 شهور

اضطريت عشان اعوض الخساره اشترى تانى 200 بسعر 84.62 على امل اعوض خسارتى بس واخرج ... هل دا تفكير صح .. ولا ارضى بالخساره واسحب الفلوس ..

علما بانى مش محتاجها حاليا بس حرام اقف اتفرج عليها وقيمتها بتقل كل اسبوع ..

ياريت اجابه صريحه ومش دبلوماسيه ... عايز بس 90 % من فلوسى ...

--------------------------------------------------------------

اخي الحبيب

الحقيقة انا مش عارف ايه موضوع الإجابات الدبلوماسية اللي ماشي في البلد ده ؟

كل الناس بتقولي بلاش دبلوماسية .... الحقبقة انا مش شايف اني دبلوماسي اطلاقا بالعكس انا كتير بيتهموني اني صريح زيادة عن اللزوم.... واضح اني عندي انفصام في الشخصية " بهزر طبعاً"

طيب تعالو اعرفكم علي نفسي بشكل اوضح و نتفق علي كام حاجة كدة

1: انا مش بحب اقول حاجة انا مش متئكد منها ... يعني لو مش عارف بحب اقول معرفش و محدش يزعل مني ارجوكم.

2: انا مش بقول لحد ابدا اشتري ايه امتا ولا بيع ايه امتا... يعني انا ممكن اديك كل المفاتيح اللي معايا لكن تبقي مهمة اختيار الباب و فتحه من عدمه مهمتك انت و قرارك الشخصي.

3: عمري ما ها قدر اتحمل مسئولية نصيحة تؤدي الي خسارة اخ من الإخوة امام الله

يا سيدي احنا تجار يعني نقدر المكسب و الخسارة فمايرضيش حد منكم انه يحملني مسئولية خسارته امام الله طالما هو مش هايديني مليم من مكسبه لو كسب من وراء نصيحة مباشرة مني .. اظن ده عدل.

اما بالنسبة للسوق و اسئلة معاليك اللي سئلتها فاليك الرد إن شاء الله.

1: التاريخ و نتائج الاعمال السابقة تؤكد انك اخترت إختيار الصندوق سليم بالارقام اللي ما بتكدبش زي قطنة مدام نظيفة كده.

2: المشكلة عندك كانت في توقيت الدخول اول مرة في اعلي نقطة تقريباً و ده درس نتعلم منه فيما يأتي .

3: الدخول في المرة الثانية و ان كان يبدو صحيحا و ستجد كثير من الخبراء ينصحون به .. و ستجد الكثير من الاراء من اشخاص مهمين و كبار في السوق بيقولو

ا) ايييييييييييييييه الاسهم بقت ببلاش يال يا ابني الحق اشتري.

ب) يا ابني صندوق ولا سهم نزل 40 او 50 او 60 % هايروح فين اكتر من كده ؟

ج) يا ابني انتا خسرت خسارة كبيرة فعلا الحق اشتري بالسعر المتدني ده و اعمل متوسط كويس عشان تقلل خسارتك.

رغم ان كل اللي فات ده يبدو منطقي و سليم لكن تعالي اسئلك شوية اسئلة

ا) السعر القليل ده هل تعتقد انه ما يقلش اكتر ؟

ب) بنسبة كام انتا ترجح انه مش ها يقل اكتر ؟ و ايه هيا اسبابك؟

ج) هل تعلم ان فيه قاعدة في اسواق المال بتقول ان الاسواق تميل الي التحرك في نفس الإتجاه ؟ يعني لو صاعد فبيميل لمواصلة الصعود و لو هابط فبيميل لمواصلة الهبوط إلي ان تحدث احداث قوية تغير هذة الوجهة ؟ طيب لو انتا تعلم ده يبقي ايه هي الاحدااث دي ؟

د) موضوع اعمل متوسط للسعر العالي اللي انتا اشتريت بيه بانك تدخل تشتري تاني بسعر قليل ده مبداء جميل جدا صح ؟ ده جميل بس في سوق صاعد اسعارة هاتعلي يوم عن يوم انما في سوق هابط فكل سعر قليل بتشتري النهارده بيه ممكن تشوف بكرة اقل منه و ده بنسبة احتمال اعلي من انك تشوف اعلي منه صح ولا مش صح ؟

4: طيب موضوع انك ترضي بالخسارة و تسحب فلوسك فطبعا ده قرار يعود اليك وحدك ... لكن اسمحلي اعرض عليك و علي الاخوة للمرة ال............ "كتير جدا لدرجة اني ابتديت اشك اني بقيت ممل " انما مرة كمان تعالي نستعرض بعض قواعد الإستثمار في البورصة اللي اتعلمناها من خبرة و علم الناس اللي قبلنا

ا) مافيش حد ابدا بيعرف يشتري من اقل نقطة و يبيع في اعلي نقطة كل مرة شراء و بيع .

ب) البورصة صعود و هبوط عمرها ما تصعد الي الابد ولا تهبط الي الابد

ج) اللي ما بعش ما خسرش ولا كسب . اللي بيكسب او بيخسر هو اللي بيبيع غير كده كل دي ارقام علي الورق " راجع قصة البراغيت في مشاركة سابقة"

د) لو انتا مستثمر في البورصة و المتوسط بتاعك انك بتاخد 6 او 7 قرارات صح لكل 10 قرارات بيع و شراء فانتا راجل جامد جدا.

ه) البورصة عاوزة نفس طوييييييييييييييل و اللي بيصبر بينول " التاربخ و الارقام هي اللي بتقول كده"

ز) تخير وقت الدخول و الخروج لتحظي باكبر عوائد علي استثمارك

ح) لا تقوم بعمل متوسطات في سوق هابط ابداً

ط) لا تستثمر في البورصة بفلوس بتاكل و بتشرب بيها استثمر فقط بما لا يزيد عن 30 - 60 % من فوائض اموالك التي تخصصها للإستثمار و لن تحتاجها في خلال عام او اكثر.

ي) لا تتخذ قرار ابدا و انت تحت رحمة السوق .

ك) لا تتخذ قرار في سوق متقلب صعودا و هبوطا بهذا الشكل.

ل) الاحداث التي نراها الان في البورصات و الإقتصاد غالبا ما يراها الإنسان مرة واحدة فقط في عمره " اخر مرة مرت علي العالم احداث مشابهة كانت فب اواخر العشرينات" يعني اللي ها ينجو من الازمة دي ما اعتقدش ها يشوف سواد اكتر من كده بقية عمرة و ده في حد ذاته كويس جدا

م) اللي معاه فلوس و عاوز يشتري جديد ما يشتريش غير لما الدنيا تستقر و نشوف ادامنا " محدش يعاند الريح في البحر ابدا" لما السوق يستقر و تظهر علامات صعود ادخل اشتري و ها تعوض بكل اللي خسرته و زيادة بعون الله. و تذكر " ان خسائر البورصة لا تعوضها غير البورصة"

بس لما ترجعلك فلوسك و تكسب كمان ما تنساش حق ربنا في الفلوس دي و افتكر اليومين دول و فرج كرب اخوانك زي ما ربنا ها يفرج كربتك و كربتنا جميعا إن شاء الله

ن) اخيرا اكيد إن شاء الله بكرة احسن من النهاردة.

اخوك عبد العزيز البغدادي