وبعدين يعني في نزول الاسعار ده

 

احد الإخوة سئلنا السؤال التالي

السلام عليكم ورحمة الله وبركاته

وبعدين يعني في نزول الاسعار ده مفيش فايدة انها ممكن ترجع تاني ولا نستعوض ربنا في فلوسنا

الواحد زهق وخايف اتهور وابيع دلوقت .. ايه الحل أفيدونا افادكم الله

و ردا علي السؤال ما اقدرش اقول غير

 

يا اخي الحبيب

محدش يقدر يقولك بيع ولا اشتري

بس كول اللي اقدر اقولهولك

1: ما تدخلش البورصة بفلوس انتا محتاجها ولا مديون بيها ولا مستلفها

2: السوق لا يستقر علي حال اللي بيطلع مسيرة ينزل و العكس صحيح

3: التاريخ و الإحصائيات لتقول ان اعلي عائد إستثمار مشروع في العالم هو الإستثمار طويل الاجل في البورصة.

4: الاسهم ولا بتاكل ولا بتشرب ما بالك بوثائق الصناديق

5: الخسارة الدفترية لا تصبح حقيقية إلا لما تبيع فعلا كول ما انتا ما بعتش انتا عمليا ما خرتش

6: ما تتعاملش مع الصناديق بمنطق اخطف و اجري اتعامل معاة بمنطق اللي مشارك علي شركة و بيقيم استثمارة مع الميزانية الختامية كل ربع او نصف سنوي او سنوي

7: ما تاخدش قرار تحت ضغط ابدا ولا ضغط الطمع في الشراء ولا ضغط خوف في البيع

تاني انا ولا بقول بيع ولا اشتري ولا احتفظ

اخيرا مش لاقي غير كلمتين جامدين من عمنا صلاح جاهين

ياسك و صبرك بين ايديك و انت حر .......... تياس ما تياس الحياه راح تمر

انا دقت من ده و من ده عجبى لقيت ....... الصبر مر و بردك الياس مر

عجبي

اخوك عبد العزيز البغدادي