هو فيه ايه ؟؟ و اللي بيحصل فينا في السوق ده ليه؟

 

بداية احب ان انوه ان كل ما يلي هو فكر و اراء شخصية تحتمل الصواب بنفس نسبة إحتمالها للخطاء

     و هي في الاول و الاخر محاولة لإستيضاح و فهم ما يحدث في السوق بين اللاعبين الاساسيين علي إختلاف احجامهم

و باب النقاش و التعليقات مفتوح لكل الإخوة للمشاركة

هل اللي بيحصل من بيع مؤسساتنا المصرية ليه علاقة بتوزيعات الارباح الدورية للصناديق او طلبات الإسترداد؟

الحقيقة ما اعتقدش ان سبب البيع له علاقة بتوزيعات الارباح

لان الصناديق اللي بتوزع ارباح سنوية و نصف سنوية وزعت فعلا من اول السنة

طبعا ده مع الاخذ في الإعتبار ان بعضها ماوزعش حاجة اصلا و البعض الاخر وزع توزيعات هايفة

و الصناديق اللي بتوزع ارباح ربع سنوية عددها محدود جدا ما تعملش كل ده في السوق بالإضافة ان كده كده الصندوق بيكون فيه احتياطي نقدي للتوزيعات و الإستردادات

فبرضو مش مضطر يبيع هدومه عشان يوزع

الناس دي عندها سبب تاني بتبيع له هو ايه الله اعلم بس  اعتقد انه ها يبان قريب

تخميني بالنسبة للي بيحصل دلوقتي

طبعا مع كل الإحترام للتحليل المالي و الفني و الإتجاهات و الكلام الكبير جدا اللي كلنا بنحاول نجتهد فيه ده

إنما احنا ممكن لو ها نفكر بعقلية التجار الكبار ها نلاقي ان فيه سببين يخوهم يعملو كده في السوق

و سبب يقول ان السوق ها يطلع يعني عا يطلع بس عاوز نفس طوييييييييييييييل

 

1. في اي تجارة بتلاقي فيه 3 مستويات من التجار

    

   1. التجار الكبار جدا و دول اللي بيكون عددهم غالبا ما بيزدش عن صوابع اليد الواحده و بيكونو هما المتحكمين في السوق بشكل حقيقي و هم اللي بيحققو المكاسب الكبيرة فعلا و دول لو دورت عليهم تلاقيهم ادام الناس مش طايقين بعض و بيبان انهم بيكسرو بعض لكن في الحقيقة هما مربطين كل الكلام و السيناريوهات مع بعض ولا يمكن يعضو في بعض "عمر حد شاف حوت بياكل حوت زيه ؟ عمرها ما بتحصل رغم انه لو كله ها يشبع بس رغم كده بيعد يفضل انه ياكل سبك بسارية كول اليوم "

   2. التجار المتوسطين و دول عددهم اكر شويتين و بيحققو الارباح بسمعان كلام الكبار بس و اللي بيفكر يهلفط بيتفرم و ما يبالوش قومة تاني

   3. التجار الصغيرين و البسارية اللي موجودين عشان الكبار ياكلوهم و بس إلا اللي بيعرف يستخبي منهم او بصاحب حد كبير يعلمه و يحميه لحد ما يكبر و دول بقي احنا

2. تعالو نخرج من البحر شوية بقي و نطبق النظرية دي علي السوق

1. لو عرفنا ان الفترة من النصف الثاني لفبراير الي اخر مارس مقرر ان يتم طرح حوالي 5 او 6 صناديق إستثمار جديدة مصرية في السوق المصري ده غير الصناديق العربية عابرة القارات اللي ها يكون لمصر نصيب من محافظها

2. لو عرفنا ان فيه نية قوية لخفض قيمة الحنيه المصري مقابل الدولار في الفترة القريبة القادمة اي ان الدولار اللي كان بتشتري بيه 5 جنيه و نص ممكن تشتري بيه 6 او 7 جنيه مستريح

3. لو عرفنا ان التحليل الفني في الازمات المهببه زي اللي احنا فيها دي بيقولك عشان تعمل محفظة جديدة شكلها من اقل اسهم نزلت في نزلة السوق عشاد دي اسهم قوية عرفت تقف في وش الطوفان و ها تعمل طلوع حلو لما الدنيا تتعدل و النص التاني من اكثر اسهم نزلت مع النزلة عشان دي اسهم خلاص اتمصمصت و مش ها يجري فيها اكتر من كده و بالتالي اي قرش ها يدخلها ها يعمل نسبة طلوع جيده لما الدنيا تتعدل برضو "لاحظ نسبة نزول الاسهم المصرية  السوق المصري مقارنه باي حته تانية في العالم"

4. لو اخدنا جملة العظيم توفيق الدقن في احد افلام الحرافيش لما قال هيا كلها بقت فتوات امال مين اللي ها ينضرب و طبقناها علي نفسية المتعاملين في مرحلة ال 8000 لغاية ال 12000 لما كان اي حد معدي في الشارع ممكن يحط فلوس في اي سهم ما يعرفش عنه اسمه الكامل حتي و يحقق منه ارباح خيالية و الحالة اللي جت لنا كلنا اننا حريفة تحليل مالي و فني و تجار و عفاريت و الناس اللي كنت تسئلها ليه بتقول السهم ده ها يطلع و يقولك خد مني الكلمتين بس و ادعيلي انتا عمرك خسرت معايا فكلنا افتكرنا نفسنا احنا اللي بنمشي السوق علي مزاجنا مش السوق هو اللي ممشينا في السكة اللي عاوزها لغاية ما نتغر و نفقد حاسة الحذر و يقوم قافل علينا الدكان و يورينا الفتوات اللي بجد

 

بعد كل الكلام ده تكون الخلاصة لو ها افكر بدماغ تاجر من الكبار ها اعمل التالي

 

1. ها احاول اضغط علي السوق علي اد ما اقدر انا و اصحابي الفتوات الجشعين و نمسك البساريا الاول نقلب كل اللي معاهم و نفضي جيوبهم "دي مرحلة الهبوط الاولي اللي انتهت بعد اجازة العيد الصغير بكام يوم " و بعدين ناخدهم رهاين لحد ما يبيعولنا اللي وراهم و اللي قدامهم عشان يفدو نفسهم و نسيبهم " ودي المرحلة التالية لحد اسبوع فات" لكن طبعا ولا ها نسيبهم ولا حاجة و لكن ها نمسكهم و نديهم علقة موت تفضل معلمه فيهم لاخر العمر عشان كل واحد منهم يفكر 12000 مرة قبل ما يدخل السوق تاني ده لو دخل تاني اصلا "و دي المرحلة اللي احنا فيها" و بعدين بعد ما كلو ياخد نصيبه نفتح الباب و نسيبهم يطلعو يجرو و السوق ما يبقاش فيه غيرنا احنا و البضاعة اللي اخدناها من الزباين اللي انضربو و نبيع اللي عاوزينه بالسعر اللي عاوزينه

2. ها انزل الاسعار بتاعو الاسهم زي ما انا عاوز طالما مربط و مظبط مع التموين و البلاديو و الحكمدار كمان و اشتري 10000 سهم بسعر جنيه النهارده ابيع منهم 100 بكرة بجنيه الا ربع عشان الغلابة ترمي اللي في اديها ادخل الم و اعمل متوسط جامد و هكذا لغاية ما اشبع و اسهمهم تخلص و نلم البضاعة المرمية في السوق دي

3. ها العب مع حطمدار العاصبة ة اقوله انتا مش كنت عاوز تقلل التضخم و تلمالسيولة من ادين الناس اللي مش بتصونها دي ولا يهمك ليك عليا ما اخليش معاهم سيولة اصلا بس انتا ريح في الكشك و اضرب واحد شاي بالياسمين

 

الخلاصة بعد ما النا اسباب اللي بيحصل فينا ده نقول طيب و بعدين العمل ايه

1. اللي بيشترو الاسهم دي مش ها يخللوها ولا يعملوها قراطيس دي ناس بتشتري النهارده عشان تبيع بعد سنين بسعر اد اللي اشترو بيه مننا 100 مرة و ها يبيعوهالنا احنا برضو علي فكرة

2. الصناديق الجديده اللي نازله دي بتاعة اسهم و بورصة مش صناديق فراوله يعني عاوزين بضاعة اللي هيا اسهم يعني هما محتاجين الاسهم اللي معنا زي ما احنا محتاجين الفلوس اللي معاهم يبقي نتقل و نعطش السوق مرة واحده لمصلحتنا "عشان نقول اننا كنا رجالة و وقفنا وقفة رجالة"

3. اللي خسر 70 او 80 % من تحويشة عمرة خلاص اتفرم و شكرا علي كده مش ها يفرق معاه لو الباقي بقي بصفر بنظبط حساباتنا كده و نمسك في السهمين اللي معانا و مت نفرطش فيهم و لو اي واحد مننا زي ما احنا متفقين انو داخل البورصة بفلوس مش عاوزها يعتبر نفسه باع الايهم خلاص و حط فلوسها في البنك في شهادة من ام 3 سنين و يستنا بعد ال 3 سنسن دول و بدل ما يروح البنك يروح شركة السمسره ها يلاقي فلوسه عمت اد البنك مرتين و تلاته

4. الصناديق و المؤسسات محدش فيهم بيعمل ميزانية كل نص دقيقة لمحفظته زينا ده العبقري فيهم بيقيم اداء محفظته كل 3 او 6 شهور و بيتحاسب مع شركة الإدارة كل سنه يبقي احنا بقي نقول ايه "نقول صبر جميل و الله المستعان " و اللي يصبر ينول يا رجالة

 

طولت عليكو ...........

معلش  بس يا رب اكون عرفت اوصل اللي عاوز اقوله

اخوكم عبد العزيز البغدادي